Cerita bakusedu METROklik
Alo, tanta Min deng Om Kale pe anak, tiap hari minggu dia rajin pi skola minggu.
Jam enam pagi Alo so ta bangon, dia langsung ba sapu kintal dulu ba ku tulung pa depe mama tanta Min.
Pas jam stenga tujuh Alo mandi kong pi skola minggu. Sampe di greja itu enci Ani, guru skola minggu langsung pangge maso pa Alo. “Maso jo Alo so mo mulai tu skola minggu”.
Enci Ani pas sementara mangajar, Utu, salah satu murid skola minggu, ba tanya pa enci Ani. “Enci kita ada baca brita di internet skola minggu kata so musti ada kepsek”.
“Ado Utu brita hoax itu, masa skola minggu musti ada kepsek,” jawab enci Ani.
“Bukang hoax enci.. Itu dang de pe undang-undang sementara DPR pusat ja susung,” Utu bale ba jawab.
Ini enci Ani, nyanda mo kase kecewa pa depe murid skola minggu, dia langsung bilang butul itu. “Kalo ba gitu Utu, sapa kang cocok jadi kepsek skola minggu?”.
Pas Alo ba lia di luar, om kostor so mo toki dua tu lonceng greja… Alo spontan ba bilang. “Om Kostor jo cocok jadi kepsek”.
Samua langsung tatawa…..hahahaha
